Ish-kryeministri Ramush Haradinaj ka thënë se është keqardhje se si përfaqësuesit e komunitetit serb, gjatë kohës sa ishte kryeministër, e kishin refuzuar një ofertë për t’u integruar.
“Për fat të keq ata nuk arritën ta kuptonin se krijimi i Ushtrisë së Kosovës, kjo edhe si parakusht i anëtarësimit në NATO, do të ishte garanca më e mirë edhe për perspektivën e komunitetit serb, por e mohuan atë duke e bërë një vlerësim të gabuar dhe duke injoruar kështu proceset integruese”, ka shkruar Haradinaj.
Haradinaj ka shkruar se vendet anëtare të NATO-s e kanë shkallën më të lartë të respektimit të të drejtave të njeriut, çka do të ishte garancë edhe për komunitetin serb.
“Është në interesin e përbashkët që sot, pavarësisht se raportet janë më të acaruara, ta kuptojmë drejt njëri-tjetrin dhe ta gjejmë rrugën, jo vetëm të de-eskalimit të situatës, por edhe perspektivën e bashkëpunimit, si e vetmja rrugë e paqes, stabilitetit dhe prosperitetit për të gjithë”, ka shkruar lideri i AAK-së. /Kosovatimes/
