Policia e Kosovës ka njoftuar për bllokim të autostradës “Arbër Xhaferi” këtë të shtunë dhe të diel në orare të ndryshme.
Bllokimi i përkohshëm i qarkullimit të automjeteve në autostradë në dy segmente rrugore do të bëhet për shkak të garës së çiklizmit, të cilën e organizon Federata e Çiklizmit e Kosovës. Kjo garë nis sot në orën 13:30, derisa nesër në orën 10:30.
“FÇK-ja për mbarëvajtje të kësaj gare ka kërkuar ndihmë nga Policia e Kosovës. Policia, bazuar në planin rreth zhvillimit të garës, datës dhe kohën e mbajtjes së saj, ka hartuar dhe do ta zbatojë një plan operativ. Më datë 15.07.2023, duke filluar nga ora 13:30, në segmentin Lipjan-Bibaj (autostrada ‘Arbër Xhaferi’) do të fillojë pjesa e parë e kësaj gare. Më datë 16.07.2023, itinerari i garës është më i gjatë (160 km), gara fillon në ora 10:30 me këtë itinerar të lëvizjes: Bibaj-Lipjan-Prishtinë, F.Kosovë (Bresje), pastaj rruga nacionale F.Kosovë-Aeroport-Komoran-Malishevë dhe anasjelltas. Gjatë kësaj kohe, më datën 15 dhe 16 korrik 2023, parashihet që të ketë bllokim të qarkullimit të automjeteve në autostradë (segmentet e lart-cekura) dhe riorientim në rrugë tjera alternative”, thuhet në njoftimin e policisë.
