“Qeveria kërkon përplasje”, ka shkruar kryetari i Partisë Demokratike të Kosovës, Memli Krasniqi.
Krasniqi ka reaguar ndaj deklaratës së ministrit të Brendshëm, Xhelal Sveçla, i cili ka shkruar se Beogradi po tenton që të bëjë luftë hibride në Kosovë, derisa e ka quajtur ministër pa karakter.
Kreu i PDK-së ka thënë se veteranët kanë paralajmëruar protestë paqësore, e që sipas tij, Qeveria Kurti po i diskriminon në çdo hap e vendim.
“Përmes një deklarate skandaloze dhe fyese ndaj veteranëve dhe gazetarëve, nxitëse mbi të gjitha – Qeveria e Albin Kurtit po kërkon përplasje. Vetëm një Qeveri e dështuar, e papërgjegjshme dhe pa fijen e ndërgjegjes, përmes veprimeve të saj, kërkon dhunë në mesin e popullit të saj. Veteranët kanë paralajmëruar sot protestë paqësore, për të kërkuar respekt dhe dinjitet nga një Qeveri e cila po i diskriminon në çdo hap e vendim. Pikërisht, për ta eskaluar këtë protestë që veteranët tanë të përballen me policinë, vëllezërit dhe motrat e veta, një ministër pa karakter si Xhelal Sveçla del me fyerje dhe nxitje të tilla”, ka shkruar Krasniqi në Facebook.
Madje, Krasniqi ka vlerësuar që kjo është një tentativë e Qeverisë që përmes nxitjes dhe skandalit ta heqin vëmendjen nga koordinimi i kryeministrit Kurti, me Millan Radojçiqin, përmes shefes së Grupit Parlamentar, Mimoza Kusari-Lila.
“Kjo Qeveri e ka humbur arsyen. E ka humbur rrugën. Shpëtimin, sikur gjatë gjithë historisë së saj, e kërkon në përplasje civile. Turp i madh! Fatkeqësi e madhe! Përgjimet dëshmuan se kush me kë po koordinohet dhe me kë po bashkëpunon – edhe në dëm të interesit të vendit”, ka shkruar tutje Krasniqi.
Njëherit, Krasniqi ka ftuar veteranët dhe të gjithë pjesëmarrësit sot në protestë për vetëpërmbajtje dhe qetësi, si dhe të mos bien pre e orkestrimit antikombëtar. /Kosovatimes/
