Teksa lufta në Ukrainë tashmë ka hyrë në muajin e 17-të, për civilët në Kiev është mbajtur një trajnim për shkathtësi të mbijetesës, përfshirë gjuajtjen me armë zjarri.
Rreth 70 për qind e të regjistruarve ishin gra, të vendosura për të mbrojtur veten dhe fëmijët e tyre.
Sipas zëvendësdrejtorit për siguri komunale në Kiev, Mykhaylo Shcherbyna, më shumë se 2000 persona janë regjistruar për trajnim, i cili u realizua më 11 korrik, ku 70 për qind e pjesëmarrësve ishin gra.
“Qëllimi kryesor këtu është që t’i mësojmë njerëzit se si të mbijetojnë dhe t’u përgjigjen këtyre kërcënimeve ushtarake që ekzistojnë”, shpjegoi Shcherbyna. Autoritetet lokale po shpresojnë se kështu duke i trajnuar njerëzit, do të parandalojnë numrin e viktimave në të ardhmen.
Shcherbyna thotë se arsyeja pse nga numri i përgjithshëm i të regjistruarve për trajnim, shumica janë gra, është sepse një pjesë e madhe e burrave veçse janë në vijën e parë të frontit.
Edhe pse Kievi nuk është tani në vijën e parë të frontit, rreziku nga minat e lëna nga rusët ekziston ende, të cilët pushtuan për pak kohë zona në periferi të kryeqytetit gjatë fazave të hershme të luftës. Ministria e Punëve të Brendshme vlerëson se potencialisht 451.000 kilometra katrorë të Ukrainës, ose pothuajse sa madhësia e Floridës në Shtetet e Bashkuara të Amerikës, janë të minuara.
“Lufta vazhdon dhe ne nuk e dimë se cili do të jetë kërcënimi i radhës”, shpjegoi ai.
