Presidenti i Afrikës së Jugut i kërkoi Gjykatës Ndërkombëtare Penale (ICC) leje për të mos arrestuar presidentin rus Vladimir Putin. Cyril Ramaposa e bëri njoftimin në përgjigje të një padie të ngritur nga Aleanca Demokratike e opozitës për të detyruar qeverinë të arrestojë presidentin rus nëse ai vjen në Johannesburg për një samit të BRICS. Ramaposa tha se arrestimi i Putinit do të ishte i barabartë me një shpallje lufte, raporton Reuters.
“Afrika e Jugut ka probleme të dukshme në përmbushjen e kërkesës për arrestimin dhe ekstradimin e presidentit Putin. Rusia e ka bërë të qartë se arrestimi i presidentit aktual do të ishte një shpallje lufte,” tha Ramaposa në një deklaratë. Ai ka sqaruar se ka iniciuar konsultime me GJNP-në për këtë çështje, por nuk ka mundur të zbulojë detaje.
Në mars, GJNP-ja lëshoi një urdhër arresti për presidentin rus Vladimir Putin me dyshimin për deportim të paligjshëm të fëmijëve ukrainas nga territoret që nuk kontrollohen nga Kievi në Rusi.
Samiti i BRICS, në të cilin është ftuar Vladimir Putin, do të zhvillohet në gusht. Afrika e Jugut është ndër vendet që kanë nënshkruar Statutin e Romës, i cili e detyron atë të respektojë vendimet e GJNP-së dhe të arrestojë Putinin pas mbërritjes.
Më herët, nënpresidenti i Afrikës së Jugut Paul Mashatile tha se autoritetet e vendit po i bëjnë thirrje Putinit që të mos vijë në samit. Në të njëjtën kohë, sipas autoriteteve të Afrikës së Jugut, Moska kundërshtoi propozimin që delegacioni rus në samit të kryesohej nga ministri i Jashtëm rus Sergei Lavrov, ndërsa India dhe Brazili kundërshtuan transferimin e ngjarjes në Kinë.
Kremlini nga ana e tij tha se ende nuk është përcaktuar formati i pjesëmarrjes së presidentit rus në takimin në Johanesburg.
