Ministria e Drejtësisë e Afrikës së Jugut të hënën i dërgoi një kërkesë zyrtare drejtorit të zyrës së prokurorit të shtetit për të lëshuar një urdhër arresti për presidentin rus Vladimir Putin, i cili dyshohet nga Gjykata Penale Ndërkombëtare në Hagë për kryerjen e krimeve të luftës në Ukrainë.
Në fillim të kësaj jave, u bë e ditur se Putini nuk do të vinte në Afrikën e Jugut për samitin e BRICS në gusht.
Kërkesa për një urdhër-arresti u bë publike të premten në një seancë gjyqësore në Pretoria, sipas gazetës lokale News24. Aleanca Demokratike e opozitës ngriti një padi për të detyruar autoritetet të përmbushin detyrimet e tyre ndaj ICC dhe të lëshojnë një urdhër arresti për Putinin. Dy muaj më parë, Departamenti i Marrëdhënieve Ndërkombëtare i Afrikës së Jugut dorëzoi në Ministrinë e Drejtësisë së vendit një urdhër të ICC-së për arrestimin e Putinit, i cili akuzohet për përfshirje në dëbimin e paligjshëm të fëmijëve ukrainas në Rusi. Megjithatë, Ministria e Drejtësisë nuk ndërmori asnjë veprim atëherë – autoritetet e vendit vazhduan negociatat për pjesëmarrjen e mundshme të Putinit në samitin e BRICS, i cili do të mbahet në gusht në Johanesburg. Aleanca Demokratike kërkoi që autoritetet të lëshojnë një urdhër arresti kombëtar për Putinin nëse ai shfaqet në territorin e Afrikës së Jugut.
Gjatë gjyqit, u bë e ditur gjithashtu se presidenti i Afrikës së Jugut Cyril Ramaposa i kërkoi Putinit më 19 qershor që të mos vinte në samitin e BRICS, për të cilin Putin u përgjigj se do të “mendonte për këtë”. Disa ditë më vonë, Ramaposa diskutoi mundësinë e pjesëmarrjes së Putinit në samit me presidentin brazilian Lula da Silva, i cili ra dakord që presidenti rus të mos vinte në Afrikën e Jugut. Pas diskutimeve me krerët e Kinës dhe Indisë, u arrit një marrëveshje që lideri rus të mos vinte në Johanesburg. Autoritetet e Afrikës së Jugut nuk deklaruan drejtpërdrejt se Putini do të arrestohej pas mbërritjes, por e bënë të qartë se kishin detyrime ndaj GJNP-së. Moska tha se Putini do të marrë pjesë në samit përmes videolidhjes dhe delegacioni rus në Afrikën e Jugut do të kryesohet nga ministri i Jashtëm Sergei Lavrov.
Ramaposa më parë pretendoi se autoritetet ruse e kishin paralajmëruar se arrestimi i mundshëm i Putinit do të shihej si një shpallje lufte. Kremlini e mohoi këtë./Kosovatimes/
