Kryetari i Aleancës për Ardhmërinë e Kosovës, Ramush Haradinaj, ka kujtuar veprimtarin e çështjes kombëtare, Adem Demaçi, në 5 – vjetorin e vdekjes.
Haradinaj tha se secili vit i jetës së bacës Adem, ishte frymëzim për brezat e sakrificës, që kulmoi me luftën e Ushtrisë Çlirimtare të Kosovës.
“Ai nuk u ndal asnjëherë së angazhuari për realizimin e idealeve për të cilat kishte kaluar tri dekada në burgjet famëkeqe serbe”,ka shkruar Haradinaj n rrjetin social Facebook.
Tutje ai ka thënë se Baca Adem do të mbetet përgjithmonë në kujtesën historike si njeriu i hekurt që nuk e mposhtën as torturat më mizore të regjimit serb.
“Mirënjohës përjetë rrugëtimit të tij jetësor në shërbim të atdheut!”, ka thënë Haradinaj.
Ndryshe, Adem Demai ishte simboli i rezistencës kombëtare, jetoi 82 vjet prej të cilave 28 i kaloi si i burgosur politik për çështjen kombëtare shqiptare. Adem Demaçi, i njohur si ‘Mandela i Kosovës’, gjithë veprimtarinë e tij ia kushtoi kauzës kombëtare.
E për kauzën dhe rezistencën e tij, në vitin 1991 Adem Demaçi u nderua me çmimin Saharov, ndërsa në vitin 1995 mori Çmimin për të Drejtat e Njeriut në Universitetin e Oslos.
