Kryetari i Partisë Demokratike të Kosovës, Memli Krasniqi, ka thënë se veprimtari Adem Demaçi është një nga personalitetet më të veçanta dhe më të guximshme të popullit tonë, ishte i gatshëm për të sakrifikuar lirinë e tij për lirinë e të tjerëve.
Krasniqi, në një postim në Facebook, tha se, përgjatë një jete me sakrifica, Adem Demaçi jetoi me dhe për atë ideal, duke e përmbushur dhe arritur më shumë se sa mund të pritet nga çdo njeri tjetër.
“Prandaj, kur pesë vite më parë ne humbëm një nga personalitetet më të veçanta dhe më të guximshme të popullit tonë, ai u largua vetëm fizikisht, sepse, tashmë Adem Demaçi u përket epokave”, shkruan ai.
Krasniqi përkujton punën dhe veprimtarinë e Demaçit duke e cituar atë: “Unë, edhe sikur të jetoja për së dyti, këtë rrugë do ta zgjidhja, sepse edukata e nënës, mësuesve, arsimtarëve të mi, ka qenë në frymën që atdheu, kombi është mbi të gjitha”.
“Të gjithë e dimë se kjo nuk ishte vetëm një deklaratë, por, një amanet i përmbushur”, ka shkruar Krasniqi, duke shtuar se edhe vet ishte një nga miliona qytetarë shqiptarë të cilët janë frymëzuar nga jeta e Adem Demaçit.
