Presidentja e Kosovës, Vjosa Osmani ka përkujtuar heroin Enver Zymberi, policin e Njësisë Speciale të Kosovës, në përvjetorin e 12 të vrasjes së tij në veri nga kriminelët serbë. Osmani e ka quajtur mishërim të përkushtimit, guximit e vetëmohimit.
“Dymbëdhjetë vjet më parë polici Enver Zymberi ra në mbrojtje të integritetit territorial të Kosovës. Sot e nderojmë guximin dhe sakrificën e heroit. Ai ishte mishërim i përkushtimit, guximit dhe vetëmohimit”, ka shkruar Osmani.
Tutje ajo ka shkruar se sot nderohet guximi dhe sakrifica e tij, teksa atij dhe kolegëve të tij, iu përulemi për kontributin e çmuar për sigurinë e vendit.
“Sikurse atëherë, ashtu edhe sot, Policia e Kosovës janë mbrojtësit e palëkundur të kufijve të shtetit tonë nga agresioni i vazhdueshëm i Serbisë, prandaj ata duhet jo vetëm të respektohen por edhe të vlerësohen e mbështeten maksimalisht për punën dhe sakrificën e tyre”, ka shkruar Osmani.
