Zëvendëskryeministri i Kosovës, Besnik Bislimi ka reaguar pasi tifozët ultras të klubit serb të futbollit, “Crvena Zvezda” të mërkurën kërkuan që ushtria serbe të kthehet në Kosovë, në një ndeshje miqësore kundër klubit italian, Fiorentina.
“Mbështetësit ultras të Crvena Zvezda “Delije” treguan një pankartë ku citohet “Kur do të kthehet ushtria në Kosovë” gjatë një ndeshjeje miqësore kundër klubit italian Fiorentina. E gjithë kjo ndërkohë që edhe Vuçiq ishte i pranishëm në tribuna”, ka shkruar Bislmi në ‘Twitter’.
Sipas, tij, i gjithë aparati shtetëror është ndërtuar në Serbi për median, sportin, artin, kulturën, shkencën që të përdoren për mjete propagandistike dhe për të nxitur dhunën, terrorin, tensionet dhe luftën.
“Delije’ shpesh dërgon mesazhe që Vuçiq nuk mund ose nuk dëshiron t’i thotë publikisht. Ai ka nevojë për akte të tilla për të ushqyer urrejtjen dhe nacionalizmin etnik në opinionin publik”, tha ai.
