Policia amerikane arrestoi një grua lakuriq, e cila filloi të qëllonte në një autostradë në Kaliforni të martën.
Gruaja, sipas dëshmitarëve okularë dhe videove në rrjetet sociale, ndaloi makinën e saj në një rrugë ndërshtetërore pranë San Franciskos, doli nga ajo krejtësisht e zhveshur dhe filloi të qëllonte me armë.
Policia tha për mediat lokale se mori një raport për një grua të armatosur që po ecte në drejtim të lindjes në autostradë.
Para se të mbërrinin oficerët, gruaja ndaloi makinën e saj të bardhë në korsitë e trafikut dhe doli nga makina me thikë. Ajo u bërtiti shoferëve aty pranë, më pas u kthye në makinën e saj dhe vazhdoi të voziste.
Pasi kaloi kabinat e pagesës, ajo u ndal sërish dhe doli nga makina.
Më pas ajo filloi të qëllonte me armë derisa i mbaruan municionet. Policia tha se nuk ka persona të lënduar nga ngjarja, por nuk dha informacione për dëmet.
Gruaja u arrestua pasi hodhi armën dhe u dërgua në spital për vlerësim mjekësor dhe psikiatrik. Për shkak të incidentit, pjesë të autostradës janë mbyllur për gati një orë e gjysmë. Oficerët e policisë thanë se nuk kishin informacione të mëtejshme dhe as nuk dinin identitetin e gruas.
