Lukas Mandl, deputet austriak në Parlamentin Evropian, ka reaguar lidhur me koreografinë skandaloze, luftënxitëse të tifozëve të klubit serb, Crvena Zvezda, në ndeshjen e futbollit kundër Fiorentinës në Beograd.
“Ju ende dëshironi të sanksiononi cilin vend? Kosovën? Josep Borrell, Oliver Varhelyi dhe Miroslav Lajcak. A mund ta shihni se çfarë po ndodh?, le të qetësohemi. Le të kontribuojmë në uljen e tensionit, pajtimin, paqen, për të gjithë ne”, ka shkruar ai në “Twitter”.
Ndryshe në ndeshjen miqësores mes Fiorentinës dhe Crvena Zvezdës, e cila u zhvillua në mesjavë në Beograd, tifo-grupi “Delije” i skuadrës serbe, u shfaq me një koreografi me tank ushtarak dhe me një sllogan: “Kur ushtria kthehet në Kosovë”.
Për koreografinë skandaloze, luftënxitëse të tifozëve të klubit serb, ka pasur reagime të ashpra nga Kosova. Kanë reaguar kryeministri Albin Kurti, zv/kryeministri Besnik Bislimi, ministri i Sportit, Hajrulla Çeku, derisa Federata e Futbollit e Kosovës ka paraqitur ankesë në UEFA, ku ka kërkuar ndëshkimin e ashpër të klubit dhe tifozëve serbë.
