Stuhia e parashikuar e shoqëruar me erëra të forta ka mbërritur sot në Kroaci dhe në Rijekë era ka rrëzuar disa pemë, raportojnë mediat kroate.
Në zonën më të gjerë të Rijekës, era e furtunëshme po shkakton probleme në qarkullim, ndërsa në Zagreb me rrethinë sot në mëngjes bie shi i shoqëruar me bubullima, transmeton portali Index.hr.
Siç njoftoi Drejtoria e Mbrojtjes Civile, në zonën e Rijekës ka pasur disa raportime nga qytetarët se kanë rënë disa pemë.
Një ndërhyrje e zjarrfikësve në Malinska na Krk është kërkuar edhe për shkak të hyrjes së ujit në një objekt.
Nga reshjet e dendura të shiut që nga mëngjesi i sotëm janë përmbytur edhe rrugët në Opatija.
Stuhia po lëviz nga perëndimi në lindje, njoftuan meteorologët, dhe alarmi portokalli i motit është në fuqi sot në Kroaci dhe Bosnje-Hercegovinë.
