Zv.kryeministri dhe ministrat e BDI-së paraqesin dorëheqjet para kryeministrit të Maqedonisë së Veriut.
Ashtu siç kishin paralajmëruar, ministrat e BDI-së, në Qeverinë e Maqedonisë së Veriut, i kanë dorëzuar dorëheqjet e tyre te kryeministri Dimitar Kovaçevski.
Zëvendëskryeministri Artan Grubi tha se dorëheqjen e kanë dorëzuar bashkë me katër ministra të tjerë. Grupi e ka publikuar letrën e dorëheqjes drejtuar kryeministrit Kovaçevski.
Në letrën të cilën Grubi ia ka përcjellur kryeministrit të Maqedonisë së Veriut, thuhet se ndihet krenarë që i pari i BDI-së, Ali Ahmeti, qytetarët, si dhe kryeministri i vendit i kishin besuar dhe i kanë dhënë mundësinë të shërbej për shtetin e Maqedonisë.
Më poshtë letra e plotë e dorëheqjes:
Për: Kryetarin e Qeverisë së Republikës së Maqedonisë së Veriut, z. Dimitar Kovaçevski
Lënda: Dorëheqje
I nderuar Kryetar I Qeverisë së Republikës së Maqedonisë së Veriut, z. Dimitar Kovaçevski,
Si bartës i funksionit të rëndësishëm publik, i vetëdijshëm për mirëqenien e qytetarëve tanë dhe ardhmërinë e tyre e cila padyshim e ka vendin në familjen e madhe evropiane,
duke e pasur parasysh emërtimin e subjektit politik të cilit i takoj dhe i cili në parim e ka integrimin e vendit si në NATO, BE dhe raportet e ngushta dhe të afërta me SHBA,
duke e pasur parasysh kushtin e pahijshëm të opozitës për ti votuar ndryshimet kushtetuese në Kuvend,
duke qenë i vetëdijshëm për rëndësinë e integrimit dhe ardhmërinë dinjitoze të Republikës së Maqedonisë së Veriut,
Po ua dorëzoj, i nderuar Kryetar i Qeverisë, dorëheqjen time nga pozita e Zëvendës Kryetarit të Parë të Qeverisë dhe ministrit për sistem politik dhe marrëdhënie ndërmjet bashkësive, të cilën ju lutem që ta aktivizoni në momentin kur opozita do ti votojë dhe do të hyjnë në fuqi ndryshimet e propozuara kushtetuese në Kuvend.
Ndjehem krenar dhe i nderuar nga besimi i liderit Ali Ahmeti, Bashkimit Demokratik për Integrim dhe qytetarëve si dhe nga besimi juaj që të jem pjesë e Kabinetit reformues dhe integrues qeveritar dhe për mundësinë të ju shërbejë qytetarëve tanë.
