Kryeministri i Republikës, Albin Kurti mbledhjen e radhës të ekzekutivit e ka nisur duke iu uruar mirëseardhje ministrit të ri të Mbrojtjes, Ejup Maqedonci, derisa e ka falënderuar edhe njëherë për kontributin, angazhimin dhe dedikimin e pashoq, ish-ministrin Armend Mehajn, ndërkaq bashkëshortes së tij i dëshiroi shërim të plotë dhe të shpejtë.
Më pas Kurti ka folur për personat me vepra kriminale e që lihen të lirë. Tha se drejtësia jonë vazhdon të jetë jo efikase dhe e ngadaltë.
“Janë të shumta rastet kur si pasojë e mosveprimit të sistemit të drejtësisë, persona të ndryshëm me precedentë të shumtë penalë, lëvizin lirshëm, qoftë të liruar nga organet apo edhe të pandjekur fare penalisht, e të cilët rrezikojnë dhe marrin jetën e qytetarëve tanë”, ka thënë Kurti.
Sipas kryeministrit nuk mungojnë edhe rastet më ekstreme tash të njohura edhe për publikun nga dënimi me burgim të përjetshtëm e që instanca e fundit e drejtësisë, Gjykata e Supreme i ka ulur liruar tërësisht nga akuza të pandehurit, në një proces maratonik gjyqësor, të gjykuar dhe rigjykuar.
Tutje ai ka përmendur dënimin e Dardan Krivaqës, i cili privoi nga jeta Marigona Osmanin.
“Në shumë raste, kur ndodhë një krim, po duhet të ngritet shoqëria në mënyrë që të kemi vendim meritor nga Gjykata. Shembull është rasti i fundit me shqiptimin e dënimit me burgim të përjetshëm të vrasësit të së ndjerës Marigona Osmani, pra Dardan Krivaqa. U dashtë një shoqëri e një popull i tërë ta dënojë publikisht krimin, në mënyrë që Gjykata të mund ta nxjerrë një verdikt meritor”, ka shtuar i pari i ekzekutivit.
Për besimin në institucionet e drejtësisë, kryeministri theksoi se niveli i besimit i qytetarëve vazhdon të jetë ndër më të ulëtit në krahasim me institucionet tjera.
“Reforma është domosdoshmëri e Vettingu është zgjidhja. Tash e 5 muaj jemi në pritje që Gjykata Kushtetuese t’i hap sa më shpejtë rrugë jetësimit të kësaj reforme. E koha po kalon. Koha që kalon është kohë e humbur”, ka theksuar kreu i Qeverisë.
“Sipas Raportit të UNDP dhe USAID – Pulsi Publik, i publikuar këtë vit, teksa niveli i kënaqshmërisë për Qeverinë është rritur në mbi 50%, për organet gjyqësore dhe ato prokuroriale trendi i tillë vazhdon të jetë i ulët. Sipas po këtij raporti, kënaqshmëria e qytetarëve për performancën e sistemit të drejtësisë – gjykata dhe prokurorinë është vetëm 29%. Sipas statistikave të gjyqësorit, gjatë vitit 2022 Gjykata e Apelit kishte kthyer në rigjykim plotë 1,754 raste. Ky raport e rëndon sistemin e drejtësisë, e ngulfat atë, e vonon drejtësinë, e humb besimin e qytetarëve, dhe si efekt përfundimtar, në mungesë të ndëshkueshmërisë efikase, rrezikon të inkurajojë krimin dhe kriminalitetin”, ka nënvizuar Kurti.
Kurti falënderoi deputetët evropian për letrën drejtuar SHBA-së e BE-së, të cilët kanë bërë thirrje për një qasje më të ashpër ndaj Serbisë.
“Ne i jemi falënderues të gjithë përfaqësuesve politikë që i janë bashkuar kësaj thirrje të përbashkët dhe e mirëpresim secilin nënshkrim dhe mbështetje të radhës. Ky lloj i mbështetjes na e forcon përkushtimin tonë për de-eskalim të plotë të situatës në katër komunat në veri të Kosovës, angazhimin për demokraci, dhe bindjen për ligjshmëri e kushtetutshmëri”, ka përfunduar Kurti.
Ndërkohë, Qeveria e Kosovës në mesin e 12 pikave në rend të ditës, pritet të miratoi Projek-udhëzimin Administrativ për masat e duhura parandaluese dhe mbrojtëse për ndalimin e pjesëmarrjes së fëmijëve në klubet e natës dhe hapësira të tjera të ngjashme.
