Policia rajonale e Ferizajt ka arrestuar të mërkurën mbrëma, njërin nga grabitësit e postës së shpejt dhe të njëjtit i kanë konfiskuar pushkën automatike me të cilin kishin kryer grabitjen. Sipas Policisë, grabitja ka ndodhur në fshatin Bablak të Ferizajt më 22 mars të këtij viti.
“Fillimisht policët e rendit, e më pas krimteknikët dhe hetuesit rajonal kanë ndalë në vendin e ngjarjes dhe nën autorizim te prokurorit kujdestar nga Prokuroria Themelore në Ferizaj i kanë nisur hetimet. Fillimisht dyshohej se tre persona nën kërcënimin e armës kanë ndaluar një veturë të postës së shpejtë dhe nga drejtuesi i veturës i kanë grabitur para në vlerë prej 770 eurove dhe janë larguar në drejtim të panjohur”, njofton policia.
Hetuesit rajonal, sipas njoftimit, pas një pune intensive hetimore, grumbullimit të informacioneve në terren, kanë siguruar prova të mjaftueshme dhe kanë identifikuar të dyshuarin, të cilin me datën 09.08.2023 rreth orës 22:00 e kanë arrestuar, dhe në banesën e tij, kanë gjetur e më pas kanë konfiskuar një armë të zjarrit automatike, me të cilën dyshohet se ka kryer grabitjen.
I dyshuari, sipas policisë, është shoqëruar në Sektorin Rajonal të Hetimeve dhe pas intervistimit nga policët hetues, në prani edhe të avokatit mbrojtës, me vendim të prokurorit të rastit është ndaluar në mbajtje për 48 orë, për procedura tjera hetimore.
