Rektori i Universitetit të Prishtinës, Qerim Qerimi ka shprehur ngushëllime për humbjen e ish-rektorit, profesor Zenel Kelmendit. Në një komunikatë për media, ai ka thënë se Kelmendi ka lënë prapa vetes krijimtari të pasur.
“Falë përkushtimit, profesionalizmit dhe kontributit të tij, ai la pas vetes një krijimtari të gjerë shkencore dhe profesionale, e cila vazhdon të jetë ndriçues dije për gjeneratat e reja në vazhdimësi”, ka thënë rektori Qerimi.
Ai theksoi se kulmi i angazhimit të Kelmendit në UP ka qenë në vitin 1998, kur ai u zgjodh rektor i UP-së.
“Përveç si rektor, profesor Kelmendi luajti rol të rëndësishëm edhe gjatë periudhës që shërbeu si dekan i Fakultetit të Mjekësisë, përgjatë viteve 1991-1996”, tha Qerimi.
Profesori Kelmendi ka nisur punën në UP në vitin 1972, kur u zgjodh asistent i lëndës së Kirurgjisë në Fakultetin e Mjekësisë, për të marrë vite më vonë gradën e profesorit nga ky institucion.
