Kryetari i Aleancës për Ardhmërinë e Kosovës (AAK), Ramush Haradinaj, ka zhvilluar takim me një delegacion nga Turqia i kryesuar nga zëvendësministri i Punëve të Jashtme të këtij vendi, Kemal Bozay.
Haradinaj ka thënë se Turqia ka mbajtur qëndrim parimor dhe ka mbështetur shtetësinë e Kosovës.
“Sot kam zhvilluar një takim me Mehmet Kemal Bozay, zëvendës ministër i Punëve të Jashtme të Turqisë, Sabri Demiri, këshilltar i lartë i Presidentit turk, Ilhan Saygili, drejtor i përgjithshëm për Ballkanin në MPJ turke dhe Sabri Tunç Angılı, ambasador i Republikës së Turqisë në Kosovë”.
“Turqia ka mbajtur një qëndrim parimor dhe vazhdimisht ka përkrahur shtetësinë e Kosovës dhe zhvillimin e institucioneve të saj”, ka thënë Haradinaj.
Haradinaj ka shtuar se në takim me delegacionin e lartë turk kanë biseduar për thellimin e marrëdhënieve mes dy vendeve.
“Në bashkëbisedim me delegacionin e lartë turk, u dakorduam për thellimin e bashkëpunimit bilateral mes Kosovës dhe Turqisë në të gjitha fushat”, ka shtuar Haradinaj. /Kosovatimes/
