Burim Ramadani, ish-kryeinspektor në Agjencinë Kosovare të Inteligjencës (AKI), ka reaguar në lidhje me rastin e arrestimit në Shqipëri të asamblistit të Lëvizjes Vetëvendosje, Besnik Mujeci, mbi dyshimet për trafikim më lëndë narkotike.
Përmes një postimi në rrjetet sociale, Ramadani ka propozuar që t’u bëhet testi për përdorim droge shumë vendimmarrësve nga nivelet shtetëror.
“Një test për përdorim droge nëpër shumë nivele shtetërore do të mund të çudiste me rezultate. Kjo nuk është shaka. Le ta bëjnë Narko-Testin të gjitha nivelet vendimmarrëse, ata dhe ato që paguhen nga taksat tona dhe vendosin se si ta shpenzojnë Buxhetin e Kosovës”, tha Ramadani në një postim në Facebook.
Sipas tij, testin për drogë duhet ta bëjnë fillimisht Presidenca, Qeveria dhe Kuvendi.
Ai thotë se është testim i lehtë praktik dhe nuk kushton shumë “për rrogat që i kanë”.
“Testi imunologjik prej më të zakonshmëve zbulon nëse personi (në rastin tonë: vendimmarrësi apo vendimmarrësja) ka përdorur kanabis, opiate, kokainë, amfetaminë dhe methamphetamine (MDMA)”, thuhet në reagimin e Burim Ramadanit, ish-kryeinspektor në Agjencinë Kosovare të Inteligjencës (AKI). /Kosovatimes/
