Gjashtë komuna nga PDK, renditen në krye të tabelës për transparencë buxhetore për vitin 2022, në raportin e publikuar sot nga Instituti GAP
Instituti GAP ka publikuar raportin “Indeksi i Transparencës Buxhetore të Komunave 2022”, i cili paraqet vlerësimin e shtatë të këtij instituti mbi transparencën buxhetore të komunave në Kosovë.
Vlerësimi, sipas GAP-it, bëhet duke u bazuar në numrin e dokumenteve buxhetore të publikuara, organizimin e dëgjimeve buxhetore me qytetarë, si dhe përgjigjeve të komunave në kërkesat e Institutit GAP për qasje në dokumente publike.
Sipas GAP-it, në vitin 2022, transparenca buxhetore e komunave ishte në nivelin më të lartë që nga publikimi i parë i indeksit, me një mesatare prej 62.8 pikësh.
“Nga gjithsej 100 pikë të vlerësimit, 28 komuna (73.7%) kanë arritur të kenë më shumë se 50 pikë. Maksimumin e pikëve të indeksit prej 100 pikë për vitin 2022 e kanë arritur shtatë komuna: Drenasi, Klina, Lipjani, Mitrovica e Jugut, Prizreni, Rahoveci dhe Skenderaj”, tha GAP-i.
GAP-i thotë se si rezultat i rritjes së numrit të dokumenteve buxhetore të publikuara, dëgjimeve buxhetore të mbajtura dhe përmirësimit të formatit të publikimit të dokumenteve, 25 komuna kanë shënuar progres në vlerësimin me pikë, katër komuna kanë shënuar regres, ndërsa komunat e tjera kanë pikë të njëjta sikur vitin e kaluar.
“Progresin më të madh me pikë në indeksin e vitit 2022 e kanë shënuar Komuna e Skenderajt (+42.5 pikë), Prizrenit (+32.5 pikë), Vushtrrisë (+31.5 pikë), Podujevës (+30 pikë) dhe e Klinës (+30 pikë). Ndërsa, regresin më të madh në renditje për vitin 2022 e ka shënuar Kaçaniku (-14 pozita), Obiliqi (-10 pozita), Graçanica (-10 pozita), Gjilani (-9 pozita) dhe Malisheva (-8 pozita)”, tha GAP-i.
Gjetjeve të këtij raporti i është gëzuar Partia Demokratike e Kosovës, e cila thotë se është renditur në krye të tabelës me gjashtë nga tetë komunat me të cilat udhëheqë.
I pari i PDK-së, Memli Krasniqi, është shprehur tejet i lumtur dhe krenar me, siç tha, “punën dhe përgjegjësinë” që tregojnë para qytetarëve dhe ligjit, kryetarët e komunave të udhëhequra nga partia më e madhe opozitare në vend.
“Gjashtë nga tetë komunat të cilat udhëhiqen nga PDK, janë renditur në krye të tabelës për transparencë buxhetore për vitin 2022, në raportin e publikuar sot nga Instituti GAP. Ky raport, i cili vlerëson transparencën buxhetore të komunave në Kosovë dhe i rendit ato në bazë të performancës, ka renditur të parën komunën e Drenasit, me 100 % të pikëve të grumbulluara, aq sa kanë edhe Mitrovica, Prizreni e Skenderaj. Jam i lumtur dhe krenar me punën dhe përgjegjësinë të cilën po e tregojnë para qytetarëve dhe para ligjit, të gjithë Kryetarët e komunave të cilat udhëhiqen nga PDK-ja, si edhe ekipet e tyre. Transparencë dhe llogaridhënie, kjo është mënyra e vetme përpara – asgjë më pak”, thuhet në reagimin e Memli Krasniqit.
