Një polic ka mbetur i lënduar nga goditja me veturë. Policia ka thënë një person i panjohur e ka goditur me veturë policin, duke i shkaktuar lëndime të lehta.
Zëvendëskomandanti i Policisë së Kosovës për rajonin e Veriut, Veton Elshani, ka deklaruar për mediet se pjesëtarët e policisë kufitare mbrëmë pas orës 22:00 kanë tentuar të ndalojnë një veturë në afërsi të Joshanicës në komunën e Leposaviqit.
Sipas tij, zyrtarët kanë dyshuar se automjeti ka hyrë në Kosovë përmes rrugëve alternative nga Serbia dhe se ka pasur kontrabandë. “Nuk është ndalur, ka goditur një polic dhe më pas ka pasur shkëmbim zjarri”, ka thënë Elshani.
Ai ka deklaruar se nga të shtënat nuk ka pasur të lënduar dhe se polici i cili u godit nga vetura ka marrë lëndime të lehta.
Policia e Kosovës për momentin nuk ka informacione për të dyshuarin pasi siç thekson Elshani, shoferi në ndërkohë është larguar, e më pas ka lënë veturën dhe ka ikur.
Policia ka sekuestruar mjetin. Elshani nuk ka dhënë informacion se çfarë ishte gjetur në veturë.
