Policia e Kosovës ka njoftuar se ka arrestuar dje dy persona të dyshuar për posedim të substancave narkotike.
Rasti ka ndodhur në rrugën “Besnik Restelica” në Prishtinë.
Sipas njoftimit të Policisë gjatë kontrollit, në afërsi të shtëpisë së njërit prej të dyshuarve, janë gjetur dhe konfiskuar 8 paketime me peshë 12.4 gramë me substanca të dyshuara narkotike të llojit marihuanë.
Po ashtu gjatë bastisjes në shtëpinë e tij janë gjetur dhe konfiskuar: 68.5 gramë substanca të dyshuara narkotike të llojit marihuanë, tre peshore digjitale, një pistoletë me 7 fishekë, dy grinder për bluarjen e marihuanës, një telefon celular dhe 150 euro para të gatshme.
Bëhet e ditur se gjatë operacionit policor në vendngjarje është paraqitur edhe i dyshuari tjetër te i cili gjatë kontrollit është gjetur dhe konfiskuar 1 gram substancë e dyshuar narkotike e llojit marihuanë.
Me vendim të prokurorit njëri prej të dyshuarve është dërguar në mbajtje, kurse tjetri është liruar në procedurë të rregullt.
