Sipas burimeve nga shërbimet e inteligjencës franceze, disa qindra rekrutë nga Serbia pritet të mbërrijnë në një nga kampet e ushtrisë ruse në Moskë deri më 1 shtator.
Deri më tani janë rekrutuar rreth 50 luftëtarë serbë dhe pritet që kontingjenti të rritet në 500 rekrutë. Ajo do të jetë pjesë e njësive të rregullta të ushtrisë ruse, dhe “njësia serbe” do të përfshihet në Divizionin 106 të Parashutës.
Sipas burimeve nga shërbimet e sigurisë, një rrjet i luftëtarëve rusë dhe serbë ka përgatitur këtë operacion që nga maji i këtij viti me iniciativën e autoriteteve ruse dhe me mbështetjen e madhe të aparatit të sigurimit shtetëror.
Rekrutët janë shtetas të Serbisë, por edhe serbë nga vende të tjera fqinje, përfshirë Bosnjën dhe Hercegovinën. Nga mesi i korrikut deri në mes të gushtit, u përzgjodhën 50 kandidatë që mbërritën në Rusi me fluturime komerciale, në grupe nga dy ose tre, nën maskën e një kompanie ndërtimi.
Procesi drejtohet nga Davor Savçiq, i njohur si “Ujku”, një serb nga Bosnja dhe Hercegovina, i cili jeton prej kohësh në Rusi dhe është një person i besuar nga autoritetet shtetërore.
Savçiq ishte anëtar i JSO-së famëkeqe të udhëhequr nga krimineli Milorad Ulemek Legija. Ai ka luftuar më parë si mercenar në grupin Wagner në Ukrainë në vitin 2014 dhe pak më vonë, në vitin 2016, në Siri.
Qytetarët e Serbisë kanë marrë pjesë aktive në luftën në Ukrainë që nga aneksimi i Krimesë nga Rusia në vitin 2014, megjithëse ligji serb i ndalon ata të marrin pjesë në ushtritë e huaja. Sipas Ministrisë së Mbrojtjes dhe autoriteteve të sigurisë në Beograd, të gjitha informacionet për serbët që luftojnë në Ukrainë janë mbledhur me kujdes, transmeton Vijesti.
Dihet se në anën e Rusisë po luftojnë disa qytetarë të Bosnjës dhe Hercegovinës. Pak muaj më parë u shfaq një video në të cilën mercenari i njohur serb Dejan Berić po bisedon me dy persona nga Bosnja dhe Hercegovina.
