Kryeministri Albin Kurti tha se Qeveria e Kosovës i ka dhënë prioritet artit edhe kulturës, duke e konsideruar si obligimi për edukimin e gjithëmbarshëm të të gjithë qytetarëve të Republikës. Këtë deklaratë Kurti e ka dhënë në hapjen e edicionit të parë të Festivalit Ndërkombëtar të Fotografisë – “Fotoist” dhe në ekspozitën “Rrethimi i Sarajevës” të fotografit Paul Lowe.
Hapja e këtij festivali me ekspozitën “Rrethimi i Sarajevës”, sipas kryeministrit Kurti, paraqet tmerrin e gjenocidit në Bosnjë dhe Hercegovinë, të rrethimit makabër të Sarajevës. “…E që jo shumë vite më pas u përsërit edhe në Kosovën tonë të dashur, me ç’rast dhjetëra mijëra ishin viktimat pa dallim, vetëm dhe vetëm për shkak se dëshironin të jetonin në vendin e tyre dhe të lirë”, tha Kurti.
Është kënaqësi, sipas tij, m’i pritë në Prishtinë mbi 25 artistë si pjesë e këtij festivali me veprat e tyre, me ekspozita, diskutime e shfaqje të filmave, e në mesin e të cilëve, ai përmendi edhe fotografët vendas, Jeton Karahoda e Ferdi Limani, por edhe artistë të famshëm si P.J. Harvey, Seamus Murphy, Paul Lowe, e Pierre e Alexandra Boulat.
“I falënderoj të gjithë ata dhe shumë të tjerë që s’po i përmendi të cilët na bëjnë të ndjehemi krenar, që në kryeqytetin e Republikës sonë, këtu në shesh publik, për të gjithë qytetarët mund të jemi edhe nikoqirë, por njëkohësisht edhe shikues të veprave të cilat kanë rëndësi artistike, por edhe historike e kulturore”, deklaroi në fund Kurti.
