Banka Qendrore e Republikës së Kosovës dhe Shoqata e Bankave të Kosovës u dakorduan për të rritur bashkëpunimin dhe komunikimin në mes të këtyre dy institucioneve, në funksion të rritjes se efikasitetit të sistemit bankar. Kështu u tha gjatë takimit të guvernatorit të BQK-së Ahmet Ismaili me kryetarin e Bordit të Shoqatës së Bankave të Kosovës, Suat Bakkal dhe drejtorin e Shoqatës së Bankave të Kosovës, Petrit Balija.
Po ashtu dy palët u dakorduan edhe për digjitalizimin e shërbimeve dhe përkrahjes së ekonomisë në rrethanat aktuale, si dhe projekte tjera qe lidhen me bankimin e qëndrueshëm dhe të përgjegjshëm.
Në këtë takim është diskutuar për situatën aktuale të sektorit bankar, me një rol shumë të rëndësishëm në mbështetjen e ekonomisë së vendit, i cili ka vazhduar, siç u tha, të karakterizohet me stabilitet, nivele të larta të kapitalit, kualitetit të mjeteve dhe likuiditetit.
Gjithashtu, sipas një njoftimi për medie, në takim u diskutua edhe për rritjen e bashkëpunimit në mes të Bankës Qendrore të Republikës së Kosovës dhe Shoqatës së Bankave të Kosovës, duke përfshirë adresimin e sfidave për implementimin e suksesshëm të Rregullores së BQK-së për qasjen në llogari pagese me shërbime bazike.
