Në Ditën Ndërkombëtare për Personave të Zhdukur ka reaguar edhe Përfaqësuesja Speciale e Sekretarit të Përgjithshëm dhe shefja e UNMIK-ut, Caroline Ziadeh, e cila u bën thirrje autoriteteve që të trajtojnë çështjen e personave të zhdukur si çështje prioritare për të lehtësuar vuajtjet e familjeve. Fati i personave të zhdukur, sipas saj, duhet të zgjidhet në frymën e pajtimit, ndërtimit të besimit dhe respektimit të të drejtave të njeriut, dhe jo të politizimit.
“U bëj thirrje autoriteteve kompetente që të ndërmarrin të gjitha masat e nevojshme për të zbatuar, në mirëbesim, Deklaratën për personat e zhdukur, për të cilën u pajtuan në maj në kuadër të Dialogut të përkrahur nga BE-ja”, tha ajo në një deklaratë për të përkujtuar Ditën ndërkombëtare të viktimave të zhdukjeve me forcë.
Zgjidhja e fatit të personave të zhdukur, sipas saj, mund të kontribuojë në procesin më të gjerë të ndërtimit të besimit, pajtimit dhe ruajtjes së paqes.
“Mungesa e progresit mund të dëmtojë dialogun e vazhdueshëm ndërmjet Prishtinës dhe Beogradit”, thotë ajo.
Ziadeh kujton gjithashtu vizitën e fundit dhe gjetjet kryesore të Raportuesit special të Kombeve të Bashkuara për promovimin e së vërtetës, drejtësisë, dëmshpërblimit dhe garancive për mospërsëritje, Fabian Salvioli, i cili në atë kohë konstatoi se politizimi i kërkimit të personave të zhdukur kishte shkaktuar zhgënjim të madh në shoqërinë civile dhe në familjet e tyre.
“Fati i viktimave të zhdukjeve me forcë duhet të zgjidhet në frymën e pajtimit, ndërtimit të besimit dhe respektimit të të drejtave të njeriut, dhe jo të politizohet”, ka deklaruar Ziadeh.
Kujtojmë se sipas KNKK-së 6,065 persona janë zhdukur në luftën e fundit në Kosovë gjatë vitit 1998-1999. Shumica prej tyre janë gjetur nëpër varrezat masive në Serbi, ndërsa edhe 1,617 të tjerë rezultojnë të zhdukur, prej të cilëve 1,355 janë meshkuj dhe 262 femra. Forcat serbe pasi kishin vrarë shqiptarë, i kishin marrë me vete trupat për t’i fshehur gjurmët e krimit.
