Shkruan: Naza KRASNIQI
Policia dhe çlirimi i Kosovës janë të lidhura njëra me tjetrën si mishi e kocka. Nëse e kthejmë memorien në pjesën e parë të viti 1999, askush nuk ka besuar se këto dy ngjarje do të ndodhin në pjesën e dytë të vitit 1999.
Ende pa u mbushur 100 ditët e çlirimit të Kosovës, themelohet institucioni i parë i shtetit të Kosovës, Policia e Kosovës, e cila tash një çerek shekulli vepron dhe funksionon si një ndër institucionet më të besueshme dhe më profesionale, pse jo edhe më së paku e korruptuar në rajon, duke llogaritur si një ndër policitë më të reja. Sot, kur e festojmë 24 vjetorin e Policisë së Kosovës, kemi parasysh, se kjo polici ka pasur shumë sfida, transformime, ndërtim të kuadrit të ri me standarde ndërkombëtare me kushte jo të mira sa i përket pajisjeve, me paga të ulëta, pa sigurim shëndetësor, në
mungesë të ligjit për pensionim të parakohshëm dhe stazhin e privilegjuar dhe tani largimi i shtesave për rrezikshmërisë.
Sot, ku kemi arritur në një moment kur mesatarja e moshës së policisë është 44 vjeçare, që sipas ekspertëve të sigurisë paraqet problem për punë operative, por përkundër këtyre problemeve të shumta, sot policia e Kosovës po i kryen me përgjegjësi dhe disiplinë të gjitha detyrat, që i kanë para vetit, duke mos kursyer as jetën vetëm e vetëm për ta mbrojtur kushtetutshmërinë e Kosovës. Prej themelimit të policisë e deri me sot, kanë rënë në detyrë 22 policë, që do thotë çdo vit nga një polic.
Por, është për të ardhur keq, dhe zhgënjyese si janë anashkaluar kërkesat e policisë për kushte më të mira. Një nder kërkesat e domosdoshme dhe obligative për të gjitha qeveritë ka qenë SIGURIMI SHENDETËSOR. Nuk mundet polici, i cili është në detyrë 24 orë me rrezik permanent për jetën, të shërbej pa sigurim shëndetësor. Kjo është
papërgjegjësi e pushteteve, të cilat me vite janë krenuar me punën dhe veprimet e policisë, por asnjëherë të gatshëm për të realizuar kërkesat e domosdoshme për jetën e tyre.
Andaj është momenti i fundit që Policia e Kosovës të realizojë të drejtat elementare, sigurim shëndetësor, ligj për pensionim të parakohshëm, shtesat për rrezikshmëri.
Shpresojmë që qeveria të merr masa urgjente që vitin e ardhshëm Policia e Kosovës ti realizojnë të drejtat elementare.
Krenar me POLICINË E KOSOVËS!
