Një video e transmetuar në rrjetet sociale ku shihen tre persona duke sulmuan një qytetar tjetër në liqenin e Vermicës, ka “shtyrë” Prokurorinë e kësaj komunë që të nis hetimet për këtë akt dhunë. Sipas njoftimit për media lëshuar nga Prokuroria Themelore e Prizrenit, janë arrestuar tre të dyshuarit, A.S., S.P., dhe I.S, nën veprën penale “Lëndim i rëndë trupor”, nga neni 186 të Kodit Penal të Republikës së Kosovës (KPRK).
Sipas njoftimit, të arrestuarit kanë sulmuar kryetarin e Federatës së Peshkatarëve dhe Rojeve të Peshkimit në Liqenin e Vërmicës, Milaim Vita.
“Prokuroria Themelore në Prizren njofton për arrestimin e tre personave A.S., S.P., dhe I.S, për shkak të dyshimit të bazuar mirë, se me datë 02.09.2023 rreth orës 06:15, në fshatin Vërmicë, komuna e Prizrenit, saktësisht tek bregu i liqenit “Drini i Bardhë”, derisa të dëmtuarit M.V., L.M., N.Rr., po bënin inspektimin në liqenin “Drini i Bardhë” lidhur me peshkimin ilegal, pasi që janë fjalosur të dyshuarit L.S., A.S., A.S., S.P., dhe I.S., me të dëmtuarit, dhe më pas i kanë sulmuar duke i goditur në pjesë të ndryshme të trupit, si pasojë e të cilave të dëmtuarit kanë kërkuar trajtim mjekësor në Spitalin Rajonal në Prizren, të konstatuara nga Raportet mjekësore”, thuhet në njoftimin e prokurorisë.
Me këto veprime, të lartcekurit në bashkëkryerje kanë kryer veprën penale “Lëndim i rëndë trupor”, nga neni 186 të Kodit Penal të Republikës së Kosovës (KPRK). “Për të njëjtit, prokuroria brenda afatit ligjor ka kërkuar caktimin e masës së paraburgimit”, thuhet në njoftim.
