Kryetari i Këshillit Kombëtar të Shqiptarëve në Luginën e Preshevës, Nevzad Lutfiu, tha se përmes një aksioni simbolik, para stacionit policor në Bujanoc, ka kërkuar nga Ministria e Brendshme e Serbisë që ta respektojnë Kushtetutën, për numrin e policëve nga komuniteti shqiptar.
Lutfiu, përmes një postimi në Facebook, ka thënë që numri i policëve shqiptar është tejet i vogël si dhe shumë prej tyre janë afër pensionimit.
“‘Respektojeni Kushtetutën’, ishte thirrja që i bëmë sot Ministrisë së Brendshme të Serbisë. Neni 77 i Kushtetutës së Republikës së Serbisë thotë: ‘Lidhur me punësimin në organet shtetërore, në ndërmarrjet publike, organet e krahinës, vetëqeverisjes lokale duhet të kihet parasysh përbërja nacionale dhe përfaqësimi proporcional i pakicave nacionale”, ka shkruar Lutfiu.
Sipas tij, numri i policëve shqiptarë është tejet i vogël, madje shumë prej tyre janë afër pensionit dhe as edhe një polic nuk është i pranuar viteve të fundit nga komuniteti shqiptar.
“I bëjmë thirrje Bashkësisë ndërkombëtare që ta kenë vëmendjen tek gjendja e shqiptarëve në Serbi, sepse diskriminimi ka prekur kufijtë e racizmit”, ka shkruar Lutfiu.
