Të premten, Ministria e Punëve të Jashtme të Ukrainës dënoi “zgjedhjet e rreme” të organizuara nga Rusia në territoret e okupuara ukrainase dhe deklaroi se këto zgjedhje ishin “të pavlera” dhe pa mbështetje ligjore, raporton Reuters.
Rusia po mban zgjedhje rajonale, duke përfshirë në katër rajone të Ukrainës që nuk i kontrollon plotësisht – Donetsk, Luhansk, Zaporizhia dhe Kherson.
Ministria ukrainase tha se zgjedhjet ruse në territorin ukrainas “shkelin rëndë sovranitetin dhe integritetin territorial të Ukrainës”, si dhe ligjin ndërkombëtar.
“Zgjedhjet e rreme të Rusisë në territoret e pushtuara përkohësisht janë të pavlefshme. Ato nuk do të kenë asnjë pasojë ligjore dhe nuk do të çojnë në ndryshim të statusit të territoreve ukrainase nën pushtimin e ushtrisë ruse”, thuhet në deklaratë.
Kievi u bëri thirrje partnerëve ndërkombëtarë që të dënojnë votimin dhe të mos njohin rezultatet e zgjedhjeve.
Sekretari amerikan i Shtetit Antony Blinken tha të enjten se zgjedhjet në territoret ukrainase të pushtuara nga Rusia ishin “të rreme dhe të paligjshme”.Ambasada ruse në Shtetet e Bashkuara u përgjigj të premten se Uashingtoni po ndërhyn në punët e brendshme të Rusisë.
