Kryeministri, Albin Kurti, e ka quajtur arritje të jashtëzakonshme faktin që Kosova do të jetë nikoqire e Lojërave Mesdhetare Prishtina 2030. Kurti tha se Kosova është përfituese e madhe për organizimin e këtyre lojërave.
“Republika e Shqipërisë do të na mundësojë shfrytëzimin e bregdetin e Durrësit për sportin e lundrimit i cili kërkon qasje në det. Do të mirëpresim mbi 5 mijë sportistë nga 25 shtete anëtare, duke përfshirë 18 shtete nga Evropa, 2 nga Azia dhe 5 nga Afrika”, theksoi Kurti.
Kurti, tha se përmirësimi dhe ngritja e infrastrukturës sportive është në qendër të aplikimit dhe fitores së Kosovës për organizimin e këtyre lojërave. “Numri total i objekteve që përfshihen në këtë projekt është 24”, theksoi kryeministri Kurti.
Kreu i Qeverisë, ka premtuar ndërtimin e një stadiumi nacional për organizimin e Lojërave Mesdhetare në vitin 2030.
Kurti ka thënë se me 250 milionët e ndara për organizimin e Lojërave Mesdhetare do të ndërtohet edhe një stadium nacional, ndërsa përmendi edhe investimet e tjera.
