Zëdhënësi i Qeverisë së Kosovës, Perparim Kryeziu ka deklaruar se nga takimi i sotëm në Bruksel ndërmjet kryeministrit Albin Kurti dhe kryetarit të Serbisë, Aleksandër Vuçiq, pret zbatim të plotë, të shpejtë dhe pa kushte të marrëveshjes së nënshkruar ndërmjet dy vendeve.
“Në takimin e sotëm, presim që pika kyçe e takimit të jetë diskutimi drejt finalizimit të planit të sekuencimit të zbatimit të Marrëveshjes Bazike, i cili duhet të jetë i drejtë, i balancuar dhe gjithëpërfshirës,” ka thënë Kryeziu për Radio Kosovën.
Në Bruksel ka nisur takimi i presidentit të Serbisë, Aleksandar Vuçiq, me Përfaqësuesin e Lartë të Bashkimit Evropian, Josep Borrell, dhe emisarin e BE-së për dialogun Kosovë-Serbi, Miroslav Lajçak.
Pas këtij takimi zyrtarët e BE-së do të zhvillojnë një takim me kryeministrin Albin Kurti, dhe pastaj pritet të zhvillohet edhe takimi trepalësh. Pas përfundimit të takimit trepalësh Borrelli pritet të deklarohet për media.
Ky është takimi i parë Kurti- Vuçiq, që kur tensionet në veri të Kosovës u rritën në fund të majit.
