Princesha norvegjeze Martha Louise (51) do të martohet me partnerin e saj amerikan, shamanin e vetëshpallur Durek Verret , verën e ardhshme, njoftoi çifti, raporton BBC.
Mbreti Harald V e uroi çiftin, duke thënë se ishte i lumtur që mirëpriste zotin Verrett në familjen e tij. Princesha dha dorëheqjen nga detyrat e saj mbretërore vitin e kaluar për të drejtuar biznesin e mjekësisë alternative që ndan me të fejuarin e saj.
Verrett është i njohur për promovimin e praktikave të pabaza mjekësore.
Ata njoftuan fejesën e tyre në qershor 2022 dhe morën bekimin e mbretit.
– Jemi të emocionuar që Durek Verrett i është bashkuar familjes dhe presim me padurim të festojmë ditën e madhe me ta. I urojmë Martës dhe Durekut gjithë të mirat, tha mbreti dhe mbretëresha norvegjeze në një deklaratë të lëshuar të mërkurën.
Dasma do të bëhet në qytetin piktoresk norvegjez të Geiranger , në brigjet e një fjordi që është shpallur si trashëgimi botërore e UNESCO-s, më 31 gusht 2024, njoftoi Martha Louise në Instagram të mërkurën.
– Verrett do të transferohet në Norvegji dhe do t’i bashkohet familjes mbretërore pa asnjë titull, njoftoi televizioni shtetëror norvegjez NRK .
Guru i Hollivudit, i cili e përshkruan veten si një “shaman i gjeneratës së 6-të” – pretendon se është ringjallur nga të vdekurit dhe parashikoi sulmet e 11 shtatorit në Shtetet e Bashkuara dy vjet përpara se të ndodhnin.
Verrett, i cili është afrikano-amerikan, pranoi se besimet e tij mund të jenë të pakëndshme për disa dhe argumentoi se kritikat me të cilat përballet janë rezultat i racizmit.
Martha Louise tha nëntorin e kaluar se nuk do të kryente më detyra zyrtare për familjen mbretërore norvegjeze deri në një njoftim të dytë. Vendimi erdhi pasi princesha u kritikua disa herë për përzierjen e interesave tregtare me titullin e saj zyrtar.
Ajo ka shkaktuar polemika në Norvegji për dekada për shkak të përfshirjes së saj në shërimin alternativ, duke përfshirë fillimin e një shkolle që synonte të ndihmonte njerëzit “të hynin në kontakt me engjëjt e tyre”.
Motra e princit të kurorës norvegjeze Haakon ka tre vajza nga martesa e saj e parë.
Princesha ishte e martuar më parë me shkrimtarin Ari Behn . Ata u divorcuan në vitin 2017 dhe Behn – i cili tha se vuante nga depresioni – kreu vetëvrasje në ditën e Krishtlindjes 2019.
