Prokuroria Speciale e Kosovës (PSK) njoftoi më 15 shtator se ka ngritur aktakuzë kundër një të pandehuri me inicialet E.B, i dyshuar për përfshirje në vrasjen e 16 civilëve shqiptarë gjatë luftës në Kosovë.
Prokuroria tha se ai dyshohet se e kreu krimin në bashkëpunim me disa persona të tjerë të forcave policore dhe ushtarake serbe në fshatin Staradran në komunën e Istogut, më 8 maj 1999.
“Kjo çështje penale tashmë i ka kaluar në kompetencë Departamentit Special të Gjykatës Themelore në Prishtinë për procedurë të mëtutjeshme”, njoftoi PSK-ja.
I dyshuari ndodhet po mbahet në paraburgim me vendim të gjyqtarit të procedurës paraprake deri në një vendim të ri nga ana e gjykatës, njoftoi ajo.
Ai akuzohet për veprën penale “krime lufte kundër popullsisë civile”.
PSK-ja tha se ai, bashkë me dy zyrtarë të tjerë të paidentifikuar, e kishin marrë me forcë në veturën e tyre një mjek me inicialet H.Sh në vitin 1988 në rrugën Drenas-Prishtinë, dhe e “kishin dërguar në ndërtesën e Sigurimit Shtetëror në Prishtinë, ku fillimisht u ishte nënshtruar rrahjeve dhe torturave dhe nga ajo ditë për fatin e tij nuk dihet asgjë.”
Me këto veprime, i pandehuri në bashkëkryerje, ka kryer veprën penale ‘’krime lufte kundër popullatës civile’’ nga neni 142 lidhur me nenin 22 të Ligjit Penal të RSFJ-së, njoftoi Prokuroria.
Gjatë luftës së fundit në Kosovë më 1998-99 janë vrarë mbi 13.000 civilë dhe mijëra të tjerë janë zhdukur.
Mbi 1.600 persona vazhdojnë të jenë ende të pagjetur – pjesa më e madhe e tyre shqiptarë.
Më herët gjatë ditës, PSK-ja njoftoi se ngriti aktakuzë kundër të pandehurit me inicialet S.F, për veprën penale krime lufte.
I dyshuari, sipas Prokurorisë Speciale, ishte pjesëtar i Sigurimit Shtetëror të Serbisë në kohën kur dyshohet se e kreu krimin në vitin 1998, gjatë luftës së fundit në Kosovë.
