Ministri i Jashtëm kuban Bruno Rodriguez tha se vendi i tij nuk i lejon qytetarët e tij të marrin pjesë në luftëra si mercenarë. Kështu, ai kundërshtoi ambasadorin kuban në Moskë, i cili tha se Havana “nuk ka asgjë kundër” kubanezëve të cilët ligjërisht lidhin një kontratë për të marrë pjesë në armiqësitë në Ukrainë në anën e Rusisë.
“Pozicioni i qartë dhe i palëkundur i qeverisë kubaneze, në përputhje me legjislacionin kombëtar, është se ajo është kundër pjesëmarrjes së qytetarëve kubanë në çdo konflikt, mercenarizëm dhe trafik njerëzor,” citohet ministri nga Reuters .
Kreu i Ministrisë së Jashtme të Kubës kujtoi se për mercenarizëm dhe trafikim njerëzor, në varësi të ashpërsisë së krimit, qytetarët kubanë përballen me një dënim të gjatë me burg apo edhe me vdekje.
Ambasadori i Kubës në Moskë, Julio Antonio Garmendia Peña, i tha agjencisë shtetërore ruse të lajmeve RIA Novosti të enjten se autoritetet kubane nuk pajtohen vetëm me procesin e paligjshëm të rekrutimit.
17 personat e arrestuar javën e kaluar, sipas ambasadorit, ishin të përfshirë në transportin e paligjshëm të mercenarëve të ardhshëm.
Një javë më parë, autoritetet kubane njoftuan arrestimin e 17 personave të dyshuar për rekrutimin e qytetarëve kubanë në ushtrinë ruse për të marrë pjesë në luftën në Ukrainë.
Ata akuzoheshin për trafikim njerëzor. Sipas hetimeve, kreu i grupit kishte kontakte me dy individë në Kubë, të cilët po rekrutonin të rinj për të marrë pjesë në armiqësitë në Ukrainë.
Në fund të majit, gazeta Ryazan Vedomosti raportoi se si disa qytetarë kubanë nga Ryazan nënshkruan kontrata me Ministrinë Ruse të Mbrojtjes dhe shkuan për të luftuar në Ukrainë.
