Presidenti francez Emmanuel Macron tha sot se ambasadori francez në Niger, Sylvain Itte, është peng në ambasadën franceze dhe se ai ha vetëm ushqime ushtarake.
Ushtria, e cila rrëzoi presidentin e Nigerit Mohamed Bazum dhe mori pushtetin më 26 korrik, urdhëroi dëbimin e ambasadorit francez në fund të gushtit pasi Parisi refuzoi të respektonte një ultimatum që kërkonte largimin e tij, raportoi BFM TV.
Franca vazhdoi të kundërshtonte largimin e ambasadorit të saj, me argumentin se qeveria e re nuk kishte autoritetin për të bërë një kërkesë të tillë.
– Në Niger, ne kemi një ambasador dhe staf diplomatik që janë fjalë për fjalë peng në ambasadën franceze – tha presidenti francez.
Ambasadori Sylvain Itte “nuk ka më mundësi të dalë, ai është persona non grata” , theksoi Macron.
I pyetur për rikthimin e mundshëm të ambasadorit në Paris, presidenti i Francës tha se do të bëjë atë që është dakord me presidentin Bazuma sepse ai është autoriteti legjitim dhe ai flet çdo ditë me të.Franca ende e konsideron Mohamed Bazum presidentin legjitim të Nigerit. Më 10 shtator, Emmanuel Macron theksoi se ridislokimi i mundshëm i forcave franceze të stacionuara në Niger do të vendoset vetëm me kërkesë të Presidentit Bazum.Qeveria e re ka refuzuar marrëveshjet për bashkëpunimin ushtarak me Francën dhe kërkon largimin e shpejtë të rreth 1500 ushtarëve francezë të pranishëm në vend.
