Në Krimenë e aneksuar, u shitën pronat e para të nacionalizuara të biznesmenëve ukrainas. Për momentin, janë mbajtur tetë ankande, në të cilat janë shitur asete me vlerë 815 milion rubla. Këtë e ka bërë të ditur kreu i këshillit shtetëror të rajonit, Vladimir Konstantinov.
Sipas tij, bëhet fjalë për pasuri të paluajtshme banesore dhe komerciale. Ai shtoi se njoftimet për shitjen e katër objekteve të tjera të banimit aktualisht janë të shpallura në ankande publike. Ato vlerësohen në rreth 27 milion rubla.
Konstantinov tha gjithashtu se është planifikuar të shiten rreth 100 prona të tjera, duke përfshirë objektet e banimit, përfshirë ato që i përkisnin familjes së presidentit ukrainas Vladimir Zelensky.
Në shkurt të këtij viti, autoritetet e Krimesë së aneksuar vendosën të shtetëzojnë rreth 700 pasuri të individëve ukrainas. Konstantinov më pas deklaroi se midis pronarëve të pronave të shtetëzuara ka biznesmenë dhe politikanë të mëdhenj ukrainas – Rinat Akhmetov, Igor Kolomoisky, Arseniy Yatsenyuk, Nestor Shufrich, Sergei Taruta dhe të tjerë. Parlamenti i Krimesë i emëruar nga Rusia beson se pronarët e aseteve janë të lidhur me autoritetet e Kievit dhe po kryejnë “veprime jomiqësore” ndaj Rusisë.
Krimea u aneksua nga Rusia në vitin 2014. Çështja e aneksimit të saj në Rusi u zgjidh me një referendum, i cili u zhvillua me shkelje të shumta dhe në kundërshtim me legjislacionin ukrainas.
Ukraina dhe shumica e vendeve të botës nuk i njohën rezultatet e referendumit dhe vazhdojnë ta konsiderojnë Krimenë si territor ukrainas.
