Bashkimi Evropian ka dalë me një komunikatë të gjatë rreth kërkesave dhe pritjeve që ka nga kryeministri i Kosovës, Albin Kurti dhe presidenti serb Aleksandër Vuçiq. Sipas komunikatës, si Kosova edhe Serbia, po rrezikojnë të humbasin mundësitë për të përparuar në rrugët evropiane
BE ka shprehur shqetësimin për mungesën e zbatimit të angazhimeve të tyre sipas marrëveshjes dhe aneksit të zbatimit të saj për rrugën drejt normalizimit, të rënë dakord në fillim të këtij viti, dhe që janë të detyrueshme dhe luajnë rol në rrugën evropiane të palëve.
“BE-ja u kërkon palëve të angazhohen me konstruktivitet dhe mirëbesim. Kjo nënkupton nisjen e zbatimit bazuar në Propozimin e BE-së pa vonesa të mëtejme, që gjithashtu përfshin detyrimin e të dyja palëve për zbatimin e plotë të të gjitha marrëveshjeve të dialogut. Puna për themelimin e Asociacionit të komunave me shumicë serbe duhet të fillojë pa ndonjë vonesë apo parakusht të mëtejmë”, thuhet në letrën e BE-së me kërkesat për Kosovën dhe Serbinë. BE-ja ua kujton palëve përgjegjësinë për të respektuar parimin e konfidencialitetit në dialog, komponentin kyç të çdo procesi negociator të ndjeshëm politik”, thuhet në letër.
BE-ja ka thënë se është e shqetësuar për mungesën e përparimit nga palët në shtensionimin e situatës në veri.
“Pavarësisht thirrjeve të përsëritura të BE-së dhe partnerëve të tjerë ndërkombëtarë, hapat e ndërmarrë deri tash mbesin të pamjaftueshëm dhe situata e sigurisë në veri mbetet e tensionuar. Në këtë kontekst, lëvizjet e Kosovës – përfshirë shpronësimet në veri, urdhrat e dëbimit, telekomunikacionin dhe përdorimi i forcave speciale të policisë për detyrat policore në komunitet – nuk janë në përputhje me sundimin e ligjit dhe rrezikon të kontribuojë në rritjen e mëtejme të tensioneve. Sulmet e vazhdueshme në shkallë të vogël nga grupet kriminale dhe frikësimi i kadetëve serbë të Policisë së Kosovës/popullatës lokale, janë të papranueshme dhe duhet të ndalen menjëherë. Bllokimi i udhërrëfyesit për energjinë nga Serbia, si dhe përpjekjet tjera që nuk janë në vijë me Marrëveshjen për normalizim dhe aneksin e saj, bien ndesh me frymën e dialogut”, thuhet në letrën e BE-së.
BE-ja thekson se është e gatshme t’i heqë masat në rast të përparimit në përmbushjen e kërkesave ekzistuese, ose të vlerësojë masat e mëtejshme ndaj të dyja palëve, nëse është e nevojshme.
BE-ja u bën thirrje të gjithë akterëve politikë, të të gjitha niveleve qeverisëse, në Kosovë e Serbi, të angazhohen me konstruktivitet në procesin që shpie në zgjedhjet e parakohshme në veri të Kosovës, që të shmangin hapat e mëtejmë të eskalimit dhe të përkrahin përparimin në dialog”, thuhet në letër.
Duke ua kujtuar Kosovës e Serbisë se rruga drejt BE-së është përmes dialogut dhe normalizimit të raporteve, BE-ja ka theksuar se të dyja rrezikojnë humbjen e mundësive për përparim në rrugën evropiane.
