Papa Françesku tha sot se emigrantët që rrezikojnë të mbyten në det “duhet të shpëtohen, duke e quajtur atë “detyrë e njerëzimit, detyrë e qytetërimit”, ndërsa pengimin e një shpëtimi të tillë e quajti një gjest urrejtjeje, transmeton Hina.
Duke folur në fillim të vizitës së tij në Marsejë, e cila do të fokusohet në çështjet e emigrantëve në Mesdhe, Papa dënoi trafikun e qenieve njerëzore si dhe indiferencën.
Ai po fliste në një shërbim lutjeje ndërfetare pranë një monumenti në portin e Marsejës kushtuar marinarëve dhe emigrantëve që humbën jetën në det.
“Nuk mund të dëshmojmë më për tragjeditë e mbytjeve të anijeve të shkaktuara nga trafikimi i neveritshëm i qenieve njerëzore dhe fanatizmi i indiferencës. Njerëzit që rrezikohen të mbyten, të lënë në valë, duhet të shpëtohen. Është detyrë e njerëzimit, është detyrë e qytetërimit”, tha Ati i Shenjtë, i cili dënon rregullisht fatin që përjetojnë emigrantët.
“Jemi në një udhëkryq: nga njëra anë, vëllazëria – nga ana tjetër, indiferenca, që e bën Mesdheun të përgjakshëm. Jemi në udhëkryqin e qytetërimeve”, tha ai.
“Përballë një tragjedie të tillë, fjalët nuk kanë dobi, por veprat”, theksoi Franjo, duke shprehur edhe një herë keqardhjen e tij që “Mesdheu është kthyer në një varrezë të pamasë ku është varrosur dinjiteti njerëzor”.
Udhëtimi i Papës në Marsejë vjen pasi një valë e re e mbërritjeve në ishullin italian të Lampedusa nxiti Bashkimin Evropian të miratojë një plan urgjent për të ndihmuar Romën të menaxhojë flukset e migracionit nga Afrika. Vizita e Papës në Francë po mbahet nën masa të larta sigurie, me rreth 6,000 anëtarë të mobilizuar të policisë dhe një sistem të veçantë sigurie, tha një zyrtar i policisë pa emër.
Të shtunën priten rreth 60 mijë persona në meshën në stadiumin Velodrome, e cila do të drejtohet nga Papa Françesku. Do t’i paraprijë shëtitja e Franjës me automobilin përgjatë Prada Avenue, ku priten 100,000 njerëz.