Ministria e Mbrojtjes hap konkursin për shkollim në akademitë ushtarake amerikane, duke ftuar të interesuarit të aplikojnë nga data 25.09.2023 deri më 08.10.2023, ora 23:59, derisa procesi i nominimit të kandidatëve do të përfundojë më datën 08.12.2023.
Përmes një njoftimi për medie, Ministria e Mbrojtjes bën të ditur se kandidatët e nominuar nga Ministria e Mbrojtjes do të testohen mëtejshëm nga akademitë përkatëse ushtarake në ShBA, derisa të drejtë aplikimi kanë të gjithë personat nga mosha 18-22 vjeç. (Mos ketë kaluar ditëlindjen e 23-të në ditën e fillimit të vitit akademik 1 korrik 2024).
Tutje, bëhet e ditur se Ministria e Mbrojtjes bën nominimin e gjashtë kandidatëve prej të cilëve një kandidat do të përzgjidhet për të studiuar në Akademinë e Forcave Ajrore si dhe nominimin e gjashtë kandidatëve prej të cilëve një kandidat do të përzgjidhet për të studiuar në Akademinë Ushtarake të ShBA-së.
“Kandidatët e interesuar duhet të plotësojnë formularin e aplikimit online https://rekrutimi.fsk-rks.org/Apply dhe bashkëngjisin të gjitha dokumentet tjera të kërkuara nga ky formular.
Njoftimi për shpalljen e konkursit mund të gjendet edhe në ueb faqen e MM-së, https://mod.rks-gov.net. Kandidatët kanë të drejtë të aplikojnë deri në ditën e fundit të përmbylljes së konkursit. Për informata plotësuese, mund të kontaktoni në nr. tel. 038- 555584 2044 dhe 038- 555584 2045 nga ora 09:00 deri 15:00 dhe në email rekrutimi@fsk-rks.org”, thuhet në njoftim. /Kosovatimes/
