Më shumë se 200 persona u plagosën në një shpërthim në një depo karburanti që tronditi sonte rajonin malor të Nagorno-Karabakut të Azerbajxhanit, ku armenët po shpërngulen pasi ushtria azerbajxhanas rimori kontrollin e plotë të territorit separatist.
Më shumë se 200 persona u plagosën në shpërthimin pranë kryeqytetit rajonal të Stepanakertit, tha në rrjetin social X, ombudsmeni i të drejtave të njeriut në Nagorno-Karabakh, Gegam Stepanyan.
Nuk dihet se çfarë e shkaktoi shpërthimin, i cili ndodhi teksa banorët ishin rreshtuar për të marrë karburantin për makinat e tyre duke u larguar nga rajoni.
Shumica e viktimave janë në gjendje “të rëndë ose jashtëzakonisht të rëndë”, tha Stepanyan, duke shtuar se viktimat do të duhet të transportohen me avion jashtë rajonit që mjekët të shpëtojnë jetën e tyre.

Ushtria e Azerbajxhanit mundi forcat armene në një ofensivë njëditore javën e kaluar, duke i detyruar autoritetet separatiste të dorëzonin armët dhe të fillonin bisedimet për “riintegrimin” e Nagorno-Karabakut në Azerbajxhan pas tre dekadash politikë separatiste.
Megjithëse Azerbajxhani është zotuar të respektojë të drejtat e armenëve etnikë në rajon dhe të rivendosë furnizimet në Nagorno-Karabakh pas një bllokade 10-mujore, shumë banorë po shpërngulen në Armeni, nga frika e hakmarrjeve.
Qeveria armene tha se më shumë se 6,500 banorë të Nagorno-Karabakh kishin ikur në Armeni që nga mbrëmja e sotme.