Vitia e Abbott diskutuan për sistemin shëndetësor në vend

Sot, Ministri i Shëndetësisë, Arben Vitia, priti në takim Ambasadorin e Britanisë së Madhe në Kosovë, Nicholas Abbott me të cilin diskutuan për çështje të ndryshme të sistemit shëndetësor në vend.

Përmes një komunikate Ministria njofton se gjatë këtij takimi, ministri Vitia e njoftoi ambasadorin lidhur me angazhimin e Ministrisë së Shëndetësisë për realizimin e  programit legjislativ, ku përfshihen projektligjet dhe udhëzimet administrative të cilat do të krijojnë parakushte për avancimin e sistemit shëndetësor në vend.

Sipas komunikatës pjesë e diskutimit ishte edhe draft ligji për sigurimin shëndetësor, pas konfigurimit të një sistemi informativ shëndetësor bashkëkohor.

Njëkohësisht, Ministri Vitia e ka njoftuar ambasadorin Abbott edhe lidhur projektet infrastrukturore të cilat do të realizohen me qëllim të ngritjes së cilësisë së shërbimeve shëndetësore, lehtësimit të qasjes për qytetarët dhe shtimin e shërbimeve të reja.

Ambasadori Abbott shprehi gatishmërinë e Britanisë së Madhe për përkrahje në programet të cilat do të mundësojnë avancimin e njohurive të profesionistëve shëndetësor nga përvoja e ekspertëve të Britanisë së Madhe, si dhe në fushën e hartimit të një legjislacioni që siguron shërbime sa më të mira për qytetarët. /Kosovatimes/