Komponentë të ndryshëm nga prodhuesit evropianë u instaluan në dronët iranianë të përdorur nga Rusia në sulmet ndaj Ukrainës, sipas një dokumenti sekret të dërguar nga Kievi për aleatët e tij perëndimorë, duke kërkuar dërgesa të raketave me rreze të gjatë veprimi për sulme në vendet e prodhimit në Rusi, Iran dhe Siri.
Në një dokument prej 47 faqesh të dorëzuar nga qeveria ukrainase në qeveritë e G7 në gusht, Kievi pretendon se në tre muajt e mëparshëm ka pasur më shumë se 600 sulme nga mjete ajrore pa pilot ruse (UAV) që përmbajnë teknologji perëndimore, raporton Guardian i Londrës.Sipas një raporti të marrë nga Guardian, 52 komponentë elektrikë të prodhuar nga kompanitë perëndimore u gjetën në dronin Shahed-131 dhe 57 komponentë në modelin Shahed-136, i cili ka një rreze fluturimi prej 2000 kilometrash dhe një shpejtësi lundrimi prej 180 kilometrash në orë.
Pesë kompani evropiane, duke përfshirë një degë polake të një kompanie shumëkombëshe britanike, u emëruan si prodhuesit origjinalë të komponentëve të identifikuar.
“Ndër prodhuesit janë kompani me bazë në vendet e koalicionit që vendosën sanksione ndaj Rusisë: SHBA, Zvicër, Holandë, Gjermani, Kanada, Japoni dhe Poloni”, thuhet në dokument.
