NATO-ja tha se ka miratuar forca shtesë për Kosovën pas sulmit të 24 shtatorit mbi Policinë e Kosovës.
Këshilli i NATO-s u takua sot për të diskutuar situatën në Kosovë, teksa u shpreh shqetësimi i thellë për tensionet në rritje në veri të vendit.
“Misioni KFOR i NATO-s mban një prani të dukshme dhe të shkathët në mbarë Kosovën. Ne gjithmonë do të ndërmarrim të gjitha veprimet e nevojshme për të ruajtur një mjedis të sigurt, të qetë dhe lirinë e lëvizjes për të gjithë njerëzit atje. Ne e bëjmë këtë në mënyrë të paanshme dhe në përputhje me mandatin tonë të OKB-së”, thuhet në njoftimin e NATO-s, transmeton RTKlive.
Më tej bëhet e ditur se që nga maji, NATO ka përmirësuar praninë dhe qëndrimin e KFOR-it. Dje, Këshilli i Atlantikut të Veriut autorizoi forca shtesë për të adresuar situatën aktuale.
Gjithashtu, thuhet se NATO do të vazhdojë që KFOR-i të përmbushë mandatin e tij, të jenë të gatshëm të bëjë rregullime të mëtejshme në qëndrimin e KFOR-it sipas nevojës.
KFOR-i, thuhet tutje në njoftim, vazhdon të koordinohet ngushtë me të gjitha palët relevante të interesit në Serbi dhe Kosovë, si dhe me Misionin e BE-së për Sundimin e Ligjit (EULEX), OSBE-në, Misionin e OKB-së në Kosovë dhe komunitetin diplomatik.
“U bëjmë thirrje të gjitha palëve që urgjentisht të angazhohen për qetësimin e situatës. Ne vazhdojmë t’i bëjmë thirrje Serbisë dhe Kosovës që të angazhohen në dialogun e lehtësuar nga BE-ja, si mënyra e vetme për të zgjidhur çështjet e pazgjidhura dhe për të arritur zgjidhje që respektojnë të drejtat e të gjitha komuniteteve. Ky është çelësi për sigurinë e qëndrueshme në Kosovë dhe stabilitetin në rajon”, thuhet, ndër të tjera, në njoftim.
