Profesori i politikës së jashtme në Universitetin Johns Hopkins, njëherët analisti për shtetet e Ballkanit, Edward Joseph ka kritikuar SHBA për qëndrimet e saj në raportin Kosovë-Serbi.
Joseph, në rrjetin social X, thotë se ka kërkuar përgjigje pse nuk kanë reaguar Ambasada e Amerikës në Serbi.
“Shtëpia e Bardhë e alarmuar po i bën thirrje Serbisë që të tërheqë vendosjen e saj përgjatë kufirit me Kosovën. Blinken theksoi [në bisedë me Vuçiqin] nevojën për të shtensionuar situatën me Kosovën. Mbi 10 orë dhe faqja e Hillit dhe faqja e Ambasadës amerikane në Beograd nuk kanë ri-shpërndarë mesazhet e krizës”, ka shkruar ai në X.
Tutje profesori universitar ka shkruar edhe datën e postimeve të fundit të këtyre dy institucioneve, duke cituar Madeline Albright.
“Duke folur në SAIS, Madeline Albright tha një herë se ‘ajo që ka më shumë rëndësi në diplomaci është ajo që thuhet publikisht’. Hill postoi për herë të fundit në Twitter më 8 shtator dhe Ambasada amerikane në Serbi më 26 shtator. Nëse do të ishit presidenti Vuçiq, çfarë mesazhi do të merrnit?”, përfundoi ai.
