Kryetari i AAK-së, Ramush Haradinaj ka komentuar sërish zhvillimet në veri, duke kërkuar nga ndërkombëtarët që ta hetojnë sulmin terrorist ndaj Policisë së Kosovës në veri, ku u vra rreshteri Afrim Bunjaku.
Lideri i AAK-së, Haradinaj ka theksuar se shtimi i numrit të pjesëtarëve të KFOR-it në Kosovë dëshmon vendosmërinë e NATO-s, se terrorizmi nuk kalon, transmeton Telegrafi.
“Shtimi i numrit të pjesëtarëve të KFOR-it, brenda mandatit që ka, dëshmon vendosmërinë e NATO-s se terrorizmi nuk kalon. Paqja në Kosovë e në Ballkan është vendosur me shumë dhimbje e tragjedi dhe prandaj nuk do të lejojmë askënd që ta rrezikojë atë. Si Kosovë qëndrojmë fuqishëm në mbështetje të të drejtave politike të të gjitha komuniteteve, edhe të komunitetit serb, kjo në bazë të Kushtetutës, ligjeve të Kosovës dhe në bazë të planit Franko-Gjerman të përkrahur nga Amerika”, ka deklaruar Haradinaj.
Ai ka theksuar se “faktet që po zbardhen përditë dëshmojnë për implikimin e thellë të Serbisë në organizimin e akteve tërroriste në veri dhe shteti i Serbisë nuk mund t’i ikën përgjegjësisë”.
