Sot anëtarët e Komisionit për Mbikëqyrjen e Agjencisë së Kosovës për Inteligjencë janë mbledhur për herë të parë pas ngjarjeve të fundit në veri të vendit.
Pas takimit në një konferencë për media, kryetarja e këtij komisioni, Ganimete Musliu, ka deklaruar se në këtë takim me drejtorin e Agjencisë së Kosovës për Inteligjencë Petrit Ajeti është biseduar siguria në vend pas sulmeve terroriste në Banjskë.
Musliu, po ashtu tha se siguria e vendit do të jetë mbi interesat partiake, duke shtuar se AKI-ja së bashku me forcat e rendit kanë qenë në krye të detyrës në mbrojte të vendit.
“Dua të theksoj me bindje të plotë se AKI bashkërisht me Policinë e Kosovës kanë qenë në krye të detyrës gjatë gjithë kohës dhe në kohë reale i janë përgjigjur çdo provokimi të situatës në veri. E kam potencuar se siguria e vendit është mbi interesat personale e partiake. Grupi terrorist i mbështetur nga Serbia, kishte pretendime territoriale përmes veprimeve hibride, agresive dhe sabotuese. Po ashtu kishte pretendim mbajtjen e situatës në tension të vazhdueshëm të ndërlidhur me interesat serbo-ruse në rajon dhe të krijonte destabilitet. Gjithashtu kishte për qëllim edhe dëmtimin e imazhit të Kosovës në arenën ndërkombëtare përmes dezinformatave dhe propagandës”, tha Musliu.
Ajo tutje tha se anëtarët e AKI-së kanë dëshmuar profesionalizmin e tyre, teksa në bazë të fakteve që janë paraqitur grupet terroriste kanë hyrë në Kosovë përmes rrugëve ilegale.
Musliu para mediave konfirmoi se nga pamjet me dronë të datës 27.09.2023 është arritur të konfirmohet se Serbia është duke ndërtuar një bazë ushtarake në afërsi me kufirin e Kosovës.
“Është vërejtur ushtri në kufi, është konfirmuar se në zonën e njohur Rogozin në afërsi të Izovorit, po ndërtohet një bazë ushtarake. Por, kjo po ndërtohet në afërsi me kufirin me Kosovën. Pamjet me dron kanë konfirmuar këtë gjë. Gjendja e sigurisë është e brishtë dhe e tensionuar, duhet të jemi të kujdesshëm ndaj çdo provokimi të mundshëm”, ka shtuar ajo.
