Gazetari amerikan Josh Kruger u vra në shtëpinë e tij në Filadelfia të Pensilvanisë , njoftuan sot autoritetet lokale. Policia e gjeti gazetarin pa ndjenja, me shtatë të shtëna me armë zjarri në gjoks dhe stomak , në rrugën para shtëpisë së tij, pas së cilës ai u transportua në spital, ku shumë shpejt u konstatua i vdekur , raporton Zëri i Amerikës. Policia ka bërë të ditur se deri më tani nuk ka asnjë të arrestuar dhe se ende nuk dihen motivet.
– Jemi në fillim të hetimeve. Ne do të shikojmë në të gjitha këndet e këtij sulmi për të hetuar motivet dhe për të sjellë para drejtësisë personin që kreu këtë vrasje të tmerrshme – tha zyrtarja e policisë Jasmine Riley për portalin amerikan.
Policia lokale beson se dikush ka hyrë në shtëpinë e gazetarit, më pas e ka qëlluar, pas së cilës vrasësi ka ikur dhe Kruger me shumë gjasa ka dalë jashtë për të kërkuar ndihmë nga fqinjët. Komiteti për Mbrojtjen e Gazetarëve regjistroi 67 vrasje të gazetarëve vetëm në vitin 2022, dhe 17 raste janë dokumentuar në SHBA që nga viti 1992. Nga ato 17 raste, Komisioni konfirmoi se 15 kishin të bënin me profesionin e gazetarit.
Përpara se të kthehej në gazetari në vitin 2021, Kruger punoi për qytetin e Filadelfisë për rreth pesë vjet, si drejtor komunikimi dhe zëdhënës i Zyrës së Shërbimeve të të Pastrehëve të qytetit. Ai u shpërblye si gazetar i pavarur dhe punoi për gazetat “Philadelphia Inquirer”, “Philadelphia Citizen” dhe “LQBTW Nation” ku shkroi për tema të ndryshme – nga komuniteti LGBTQ deri tek politika e qytetit dhe e shtetit.
Faqja e internetit e Kruger thotë se ai është “i njohur për sjelljen e përvojave të të pastrehëve, HIV-it, ekonomisë gri të Filadelfias, traumës dhe varfërisë përmes shkrimeve dhe komenteve të tij”.
