Kancelari gjerman Olaf Scholz bëri thirrje për një zgjidhje paqësore midis Beogradit dhe Prishtinës.“Për mua është shumë e rëndësishme që situata të mos eskalojë më tej mes Serbisë dhe Kosovës. Ne duam një zgjidhje paqësore dhe jemi shumë të përkushtuar për këtë. Gjermania, Franca dhe Italia janë veçanërisht aktive në këtë drejtim”, tha Scholz në një konferencë të përbashkët për shtyp me kryeministrin bullgar Nikolai Denkov në Berlin, raporton Anadolia Agency.
Ai shtoi se situata në Kosovë do të diskutohet të enjten dhe të premten kur liderët nga pothuajse 50 shtete evropiane do të takohen në Granada të Spanjës, në Samitin e Komunitetit Politik Evropian.
Në samit, ndër të tjera, do të marrë pjesë edhe presidenti i Serbisë, Aleksandar Vuçiq.
