Kryeministri i Kosovës, Albin Kurti, priti në takim kryetarin e Lëvizjes për Progres Demokratik, Shqiprim Musliu, njëherësh nënkryetar i Komunës së Bujanocit, me të cilin biseduan për brengat dhe shkeljet, të cilat në mënyrë të vazhdueshme i përjetojnë pakica shqiptare në Serbi nga qeveria në Beograd.
Të dy përfaqësuesit biseduan se çka mund të bëjnë së bashku për të përmirësuar gjendjen e shqiptarëve në Luginën e Preshevës.
Sipas njoftimit lëshuar nga Qeveria e Kosovës, Kurti e njoftoi nënkryetarin Musliu me zhvillimet e fundit në vend dhe situatën e sigurisë, veçanërisht pas sulmit terrorist, paramilitar dhe kriminal mbi Policinë e Kosovës, të dielën e 24 shtatorit, ku në krye të detyrës ra rreshteri i Policisë, tash heroi i Kosovës, Afrim Bunjaku.
Kurti e Musliu u dakorduan për komunikim të rregullt dhe koordinim të vazhdueshëm për çështje me interes për shqiptarët në Preshevë, Medvegjë dhe Bujanoc, thuhet në njoftim.
